ફેક્ટરીમાંથી ડ્રાઇવર વગર માલિકના ઘરે પહોંચી ટેસ્લા કાર:દુનિયાનો પ્રથમ કિસ્સો; ઓટો ડ્રાઇવ કારની શરૂઆતની કિંમત ₹ 34 લાખ

દુનિયામાં પહેલી વાર એવું બન્યું કે કોઈ કાર ફેક્ટરીથી ખરીદનારના ઘરે ડ્રાઇવર વગર પહોંચી. દુનિયાના સૌથી ધનિક બિઝનેસમેન ઈલોન મસ્કે પોતાના જન્મદિવસ પર પોતાની કંપની ટેસ્લાની સંપૂર્ણ સ્વાયત્ત (સેલ્ફ-ડ્રાઇવિંગ) કાર ડિલિવર કરી. કસ્ટમરના ઘરે પહોંચેલી ઇલેક્ટ્રિક કાર 'મોડેલ Y' છે. ટેસ્લાએ X પર કારની ડિલિવરીનો વીડિયો શેર કર્યો છે. આમાં, કાર પોતાની મેળે આગળ વધતી જોઈ શકાય છે. જ્યારે કોઈ કાર કે વ્યક્તિ તેની સામે આવે છે ત્યારે તે સિગ્નલ પર અટકી જાય છે અને પછી આગળ વધે છે. સેલ્ફ-ડ્રાઇવિંગ કારની ડિલિવરીનો વીડિયો... ડિલિવરી દરમિયાન કાર 116 કિમી પ્રતિ કલાકની ઝડપે દોડી હતી કંપનીએ સત્તાવાર પોસ્ટમાં જણાવ્યું હતું કે- અમે ટેક્સાસ શહેરમાં સંપૂર્ણપણે સેલ્ફ-ડ્રાઇવિંગ કાર મોડેલ Yની પ્રથમ ડિલિવરી કરી છે. કાર કોઈપણ ડ્રાઇવર કે રિમોટ ઓપરેટર વિના પાર્કિંગ સ્થળો, હાઇ-વે અને શહેરના રસ્તાઓ પર તેના લોકેશન સ્થાને પહોંચી. બ્લૂમબર્ગના અહેવાલ મુજબ, ટેસ્લાના AI અને ઓટોપાયલટના વડા, અશોક એલુસ્વામીએ જણાવ્યું હતું કે- ડિલિવરી દરમિયાન કારે 72 mph (એટલે ​​કે 116 kmph)ની ટોચની સ્પીડ હાંસલ કરી હતી. ટેસ્લા મોડેલ Yની કિંમત લગભગ 34 લાખ રૂપિયા છે ટેસ્લાએ મોડેલ Yને સેલ્ફ ડ્રાઈવિંગ બનાવવા માટે અપડેટ કર્યું છે. પહેલી વાર માર્ચ 2019માં લોન્ચ કરવામાં આવી હતી. વિશ્વભરમાં મોડેલ Yની કિંમત $40,000 (લગભગ રૂ.34 લાખ)થી શરૂ થાય છે. તે 3 વેરિઅન્ટમાં ઉપલબ્ધ છે - રીયર વ્હીલ ડ્રાઇવ, લોંગ રેન્જ અને પરફોર્મન્સ. પરફોર્મન્સ વર્ઝન $60,000 (લગભગ રૂ. 51 લાખ) માં આવે છે. અમેરિકામાં ટેસ્લાની રોબોટેક્સી સેવા શરૂ અગાઉ 22 જૂને, કંપનીએ રોબોટિક ટેક્સી સેવા શરૂ કરી હતી જેમાં કાર પોતાની મેળે ચાલી રહી હતી પરંતુ સલામતીના દૃષ્ટિકોણથી, કંપનીના એક નિષ્ણાત બેસીને તેનું ટેસ્ટિંગ કરી રહ્યા હતા. કંપનીએ રોબોટેક્સીની એક રાઈડની કિંમત $4.20 એટલે કે લગભગ રૂ. 364 રાખી છે. આ વાહનો ઑસ્ટિનના એક વિસ્તારમાં સવારે 6 વાગ્યાથી બપોરે 12 વાગ્યા સુધી દોડી રહ્યા છે. જોકે ટેસ્લાએ રોબોટેક્સી સેવા ક્યારે જાહેર જનતા માટે ખુલ્લી મૂકવામાં આવશે તે અંગે કોઈ ખુલાસો કર્યો નથી, પરંતુ મસ્કે આ સેવાનો વિસ્તાર કરવાનું અને ટૂંક સમયમાં અન્ય યુએસ શહેરોમાં પણ તેને શરૂ કરવાનું વચન આપ્યું છે. કંપનીના સીઈઓ ઈલોન મસ્કે X પર એક પોસ્ટમાં આ માહિતી આપી હતી. મસ્કે પોસ્ટમાં કહ્યું- 'રોબોટેક્સી લોન્ચની સફળતા માટે ટેસ્લા AIની સોફ્ટવેર અને ચિપ ડિઝાઇન ટીમને અભિનંદન. આ 10 વર્ષની મહેનતનું પરિણામ છે. ટેસ્લાની ટીમે કોઈપણની મદદ વિના જાતે જ AI ચિપ અને સોફ્ટવેર બનાવ્યું છે.' નવા યુગની શરૂઆત ટેસ્લા એક સિસ્ટમ ઓફર કરે છે જેને તે "ફુલ સેલ્ફ ડ્રાઇવિંગ" કહે છે. પરંતુ તેનું નામ હોવા છતાં, તેને હંમેશા ડ્રાઇવર હાજર રહેવું જરૂરી છે. આનાથી વાહનો સંપૂર્ણપણે સ્વાયત્ત બનતા નથી. કંપનીએ કહ્યું છે કે- તેનાથી અલગ રોબોટેક્સીમાં સોફ્ટવેરના "અનસર્વાઇઝ્ડ" વર્ઝનનો ઉપયોગ કરીને તેનું નેટવર્ક ચલાવશે. આનો અર્થ એ છે કે કોઈ ડ્રાઇવરે દેખરેખ રાખવાની જરૂર નથી, વાહન પોતે જ તેની રીતે ચાલશે. ટેસ્લા બે વધુ પ્રોજેક્ટ્સ પર કામ કરી રહી છે 1. સ્ટીયરિંગ અને પેડલ વગરની 'સાયબરકેબ' ટેસ્લાના સીઈઓએ ગયા વર્ષે ઓક્ટોબરમાં કેલિફોર્નિયા, યુએસએમાં આયોજિત 'વી-રોબોટ' ઇવેન્ટમાં AI ફીચર સાથેની તેમની પ્રથમ રોબોટેક્સી 'સાયબરકેબ'નું કોન્સેપ્ટ મોડેલ જાહેર કર્યું હતું. આ બે સીટર ટેક્સીમાં ન તો સ્ટીયરિંગ છે કે ન તો પેડલ. ગ્રાહકો $30,000 (લગભગ રૂ.25 લાખ)થી ઓછામાં કિંમતે ટેસ્લા સાયબરકેબ ખરીદી શકશે. સાયબરકેબમાં ન તો સ્ટીયરીંગ છે કે ન પેડલ છે 2. ટેસ્લા રોબોવેન પણ લાવશે ટેસ્લાએ તેના વી-રોબોટ ઇવેન્ટમાં રોબોટેક્સી સાથે બીજું એક સેલ્ફ ડ્રાઈવિંગ 'રોબોવેન' પણ રજૂ કરી હતી, જે 20 લોકોને લઈ જવા સક્ષમ છે. તે સામાન પણ લઈ જઈ શકે છે. તેનો ઉપયોગ સપોર્ટ ટીમોના ટ્રાન્સપોર્ટેશન માટે થઈ શકે છે. ઈલોન મસ્ક ટેક્સીઓનો કાફલો વિકસાવવા માંગે છે મસ્ક સેલ્ફ-ડ્રાઇવિંગ ટેસ્લા ટેક્સીઓનો કાફલો વિકસાવવાની યોજના બનાવી રહ્યા છે. ટેસ્લાના માલિકો તેમના વાહનોને પાર્ટ-ટાઇમ ટેક્સી તરીકે પણ લિસ્ટ કરી શકે છે. એટલે કે, જ્યારે માલિકો તેમની કારનો ઉપયોગ ન કરતા હોય ત્યારે તેઓ નેટવર્ક દ્વારા પૈસા કમાઈ શકે છે.