પાકિસ્તાન ક્રિકેટ ફરી એકવાર હાંસિયામાં ધકેલાશે:આવતીકાલની IND Vs PAK મેચમાં પાયક્રોફ્ટ ફરી મેચ રેફરી હશે; હેન્ડશેક કોન્ટ્રોવર્સીના સવાલોને ટાળવા PAK ટીમે પ્રેસ કોન્ફરન્સ રદ કરી

ભારત સામેની મેચ પહેલા પાકિસ્તાન ટીમે શનિવારે સાંજે તેની પ્રેસ કોન્ફરન્સ રદ કરી હતી. ટુર્નામેન્ટના એક સૂત્રએ PTIને જણાવ્યું હતું કે, "પાયક્રોફ્ટ અને હાથ ન મિલાવવાના વિવાદ અંગેના પ્રશ્નો ટાળવા માટે પાકિસ્તાને ફરી એકવાર તેની મેચ પહેલાની પ્રેસ કોન્ફરન્સ રદ કરી છે." આ દરમિયાન, ભારતીય કેપ્ટન સૂર્યકુમાર યાદવે સવારની પ્રેસ કોન્ફરન્સમાં હાજરી આપી હતી. પાકિસ્તાન સામેની મેચ વિશે પૂછવામાં આવતા, તેણે પાકિસ્તાનનું નામ લીધા વિના કહ્યું, "અમે સુપર-4 મેચ માટે તૈયાર છીએ." અગાઉ, સૂર્યાએ 14 સપ્ટેમ્બરના રોજ ગ્રૂપ સ્ટેજ મેચ દરમિયાન પાકિસ્તાની કેપ્ટન સલમાન આગા સાથે હાથ મિલાવવાનો ઇનકાર કર્યો હતો. કેપ્ટને એક પ્રેસ કોન્ફરન્સમાં કહ્યું હતું કે, "અમે અહીં ફક્ત મેચ રમવા માટે આવ્યા હતા અને અમે યોગ્ય પ્રતિક્રિયા આપી હતી. કેટલીક બાબતો રમતગમતની ભાવનાથી આગળ છે. અમે પહેલગામ આતંકવાદી હુમલાના તમામ પીડિતો અને તેમના પરિવારો સાથે ઉભા છીએ અને અમારી એકતા વ્યક્ત કરીએ છીએ." આ પછી, હાથ ન મિલાવવાનો મુદ્દો વધ્યો અને PCBએ રેફરીને હટાવવાની માગ પણ કરી, જોકે આવું થયું નહીં. ગ્રૂપ સ્ટેજ મેચ પછી વિવાદ થયો હતો પાકિસ્તાની ખેલાડીઓ સાથે હાથ ન મિલાવવાના વિરોધમાં સલમાન આગાએ મેચ પછીની પ્રેઝન્ટેશન છોડી દીધી. પાકિસ્તાનનો આગામી મેચ 17 સપ્ટેમ્બરે UAE સામે રમાવાનો હતો, પરંતુ ટીમે રેફરીને હટાવવાની માંગણી કરતી ICCમાં ફરિયાદ નોંધાવી હતી. જો પાયક્રોફ્ટને દૂર કરવામાં નહીં આવે તો PCBએ એશિયા કપમાંથી ખસી જવાની ધમકી પણ આપી હતી. મેચના દિવસે, PCBના અધિકારીઓએ ICC અને મેચ રેફરી સાથે ચર્ચા કરી હતી. પરિણામે, રાત્રે 8 વાગ્યે શરૂ થનારી મેચ એક કલાક મોડી પડી હતી. પાયક્રોફ્ટ મેચ રેફરી હતા. UAE સામેની મેચ પહેલા પણ કોઈ પ્રેસ કોન્ફરન્સમાં આવ્યું નહોતું UAE સામેની મેચ પહેલા, પીસીબીએ એશિયા કપમાંથી ખસી જવાની ધમકી આપી હતી. પાકિસ્તાન સરકારે ટીમને સલાહ આપી હતી કે જ્યાં સુધી પાયક્રોફ્ટને હટાવવામાં ન આવે ત્યાં સુધી મેચ ન રમે. PCBના ચેરમેન મોહસીન નકવીની સલાહ પર, પાકિસ્તાને UAE મેચ પહેલા પ્રેક્ટિસ કરી હતી, પરંતુ ટીમમાંથી કોઈએ પ્રેસ કોન્ફરન્સમાં હાજરી આપી ન હતી. સૂર્યાએ કહ્યું- અર્શદીપ બેટિંગ કરવા માગતો હતો ભારતીય કેપ્ટન સૂર્યકુમાર યાદવે કહ્યું કે અર્શદીપ સિંહ ઓમાન સામેની મેચમાં બેટિંગ કરવા માગતો હતો, તેથી તે બેટિંગ કરવા માટે ઉતર્યો નહીં. શુક્રવારે ભારતે ઓમાન સામે 8 વિકેટ ગુમાવીને 188 રન બનાવ્યા હતા. કેપ્ટન સૂર્યકુમાર યાદવ બેટિંગ કરવા ઉતર્યા ન હતા. સૂર્યાએ પ્રેસ કોન્ફરન્સમાં કહ્યું, 2-3 ઓવર બાકી હતી અને અર્શદીપ સિંહે મને કહ્યું કે તે બેટિંગ કરવા માગે છે, મેં કહ્યું કે કોઈ સમસ્યા નથી.